02.09.2026 : Vawiin khan Hon’ble Mr. Justice Nelson Sailo, Judge, Gauhati High Court and Executive Chairman, Mizoram State Legal Services Authority chuan naupang harsatna tawk mekte Court-ah an kal hunah an intihhlimna tur bungrua chi hrang hrang District Court, Aizawl-a Child Friendly Room-a dah turin Mizoram State Commission for Protection of Child Rights hnenah a hlan.

He inhlanna hun hi Chld Friendly Room, District Court, Aizawl-ah neih a ni a. Justice Nelson Sailo chuan India Sawrkarin naupangte humhimna tur dan tam tak a siam a. India Sawrkar chuan naupangte hi a humhalh tlat a, nakina kan ram hruaitu turte an la nih avang hian naupangte zingah Court-a kal ngei ngei ngai an awm chang Court chu hmun hlauhawm emaw an tih lohna turin an tan intihhlimna tur dah hi a tul tak zet thu a sawi. Legal Services Authority chuan Aizawl-ah chauh lo pawh District Court hrang hrangah Child Friendly Room-ah dah tur hian naupangte inkhualtelemna hmanrua hi dah turin hma la chhoh zel a nih tur thu a sawi.

Pi Lalhmingchhuangi, Child Welfare Officer chuan kum 2024 atanga 2026 chhung hian Child Friendly Room, Aizawl-ah hian naupang 1145 hruai an ni tawh a, chung zinga mi 207 chu naupang pawngsual tawk an nih thu a sawi.

Pu Jimmy Laltlanmawia, Chairperson, Mizoram State Commission for Protection of Child Rights chuan Court-a naupang hruaite’n hlim taka hun an hman theihna tura Mizoram State Legal Services Authority-in naupangte intihhlimna tur thil chi hrang hrang an pe chu a lawmawm takzet a, naupangte chunga hleilenna tituten an thil tihsual ang taka hremna an hmuh theihna tura naupangte Court-a hruai an ngai thin hi a pawi takzet a, chutihrualin, naupangten Court hi hmun hlauhawm leh tihbaiawm-ah an ngaih lova, dik taka rorelna a nihna hmun tih an hriat theih nan te, hlim taka hun an hman theihna tura ngaihsaktu an nei hi lawmawm a tih thu a sawi bawk.

He hunah hian Hon’ble Mr. Justice Kaushik Goswami, Judge, Gauhati High Court te, Judicial Officer te leh mi pawimawh eng emaw zat an tel a ni.