Legal Services

Awle, tun hunah hian ka bula thu, Pu ________________ nen hian “Para Legal Volunteers te pawimawhna” chungchang kan sawiho dawn a ni a. He topic kan sawi hma hian sawi tel loh theih loh, Legal Services Authority hi han sawi hmasa ta lawk ila.

Legal Services Chungchang :

Kum 1977 -a India danpui - Constitution siam that a nih khan Directive Principles of State Policy-ah Article 39A an belh a, chutah chuan retheihna emaw harsatna dang avanga mimal dikna chanvo kenkawhna daltu a awm loh nan leh dikna chu ang khat pata hlenchhuah anih theih nan Sawrkar-in dan a siam tur a ni tih a ni a. Hemi tihlawhtling tur hian Sawrkar laipui chuan Mr.Justice P.N. Bhagwati leh Mr.Justice Krishna Iyer, Supreme Court Judge te kaihhruaina hnuaiah Committee a din a, chu committee report atang chuan committee sang­ “Committee for Implementing Legal Aid Scheme” (CILAS) an tih chu kum 1980 khan din a ni leh a, Chairman atan Mr.Justice P.N.Bhagwati, Supreme Court roreltu chu ruat a ni zui ta bawk. He committee-in a ruahmanna angin State tin chuan anmahni State remchan dan nena siamrem pah chungin Legal Aid Schemes chu an siam ta hlawm a, Mizoram pawhin remchan dana siam remin The Mizoram Legal Aid & Advice Schemes, 1986 chu siam a lo ni ve ta a ni

            India Parliament chuan 1987 khan Legal Services Authority Act an tih chu a lo passed leh ta bawk a. Hemi Act hmang hian nasa zawkin mipuite rawngbawl hna chu thawh a lo ni ta bawk a ni. Legal Services Authority chuan mipuite`n kan dikna chanvo te kan humhim theihna turin dan inhrilhhriatna hun (legal awareness) te a hmang thin a, tin, court-ah mahni sum senso ngai lovin a thlawnin a mamawhte tan Ukil rawihsak thin an ni, chu bakah chuan awlsam zawka kan harsatna chinfel a nih theih nan leh inrem taka kan awm theih nan Lok Adalat (Mipuite court) pawh a buatsaih zel bawk a. Tun tuma kan sawiho tur PLV pawimawhna pawh hi Legal Services Authority-in Scheme a siam tam tak zinga pakhat, kan harsatna min chinfelpuitu turte chungchang a ni tih kan lo hre hmasa dawn nia.

PLV ni tur chuan engnge tul,  thiamna lamah te, thil dangah pawh a ni ang chu?

= Zirtirtu (including Retired), Sawrkar hnathawk pension tawh, senior citizen, Dan lam thiam te, ziak leh chhiar thiam, a tul huna mite lehkha ziahsak thei tur chin ti mai ila, khawtlang tana mi inpe, mite thatna duhtu zawng zawng chu a huam vek thei ang chu.

Engtin nge PLV nih theih dan tur? PLV nih dawn chuan dilna siam tur nge, nangmahni lam atangin in ruat tawp mai thin zawk.

=  Dilna siam a ngai ve thin a, a chang chuan dilna an siam kher loh pawhin Office lam atang zawkin a tul nia hriat vang pawhin PLV tur an awm thei em tih te pawh thin a ni bawk.

Training te a ngai em?

= Training hi chhawng thum – Orientation Programme, Basic training leh Refresher course te neih thin a ni a, he training chhawng thuma trained chhuakte hi duhthusamah chuan PLV ni thei se, mite tanpuina kawngah an tangkai leh zual dawn a ni.

A nih leh, PLV an ni tih miten an hriat theih maina tur thil eng emaw siamsak an ni em le?

= Ni e, Identity Card siam sak an ni a, he Id. hi kum khat chhung atan zel siam a ni thin.

PLV te chuan engnge an thawh a, Legal Services Authority hmalakna kawngah eng ang takin nge an tangkai?

= Sawi tak ang khan, PLV te hian kawng tam takin Legal Services Authority hna thawh hi an pui a, an chungah LSA pawh a lawm thin hle a, Legal Awareness ah te, tin LAC clinic-ah miten an harsatna an thlenin, an harsatna tam tak an lo chinfel sak thin a, an chinfel sak theih mai loh chu a tih dan tur kawng an lo kawh hmuh a, lehkha ziak sak ngai chi an nih phei chuan an ziah sak a, dan leh dun lam kher pawh ni lo, sawrkar laka miten harsatna an tawhin an lo tanpui thin bawk a ni.

            Han sawi thui deuh ila, zo khaw lam atanga hmunpui han pan mai hi harsat chang a awm thin a, chung hunah te hlei hlei chuan heng kan PLV te hi an tangkai leh zual thin a. Court/Office dawr tura kalna senso tam tak kha miten an pumpelh phah fo thin a, tin, an kal ngei ngei a ngai a nih pawhin thil tul ang angte keng sain, vei tawn sek ngai lovin an awm phah thin a ni. Mite tan malsawmna an nih ringawt mai a ni.

A nih leh, PLV te chuan engnge hlawh an nei nge, a lawmman ang zawngin in pe thin? Chutianga mite tanpui hna an thawh chuan hun tam tak an lo seng ve ang a, a thlawn ringawt chuan a lo theih reng bik awm si lo va?

= Hlawh ang chuan sawi a ni lo va, lawmman ang chauh inpek a ni a. Ni e, a thlawn ringawta inchhawr thu chu a awm lo alawm. Tin, lawmman inpek bakah hian an chetvelna senso te pawh rulhsak leh tura ruahman chu siam a ni alawm.

Tunah hian PLV eng zat nge awm tawh le?

= A zat chiah hi sawi fak a har deuh thin a, A chhan chu heng PLV te hi District LSA enkawl an nih avangin thla tin report kan dawn atang hian sawi ta mai ila, report hnuhnung ber, July, 2016 thla report atanga chuan tunah hian PLV  – 140 vel kan nei mek a ni.

Nichin khan Legal Aid Clinic tih kha sawi rik zauh a awm a, engnge LAC chu a awmzia ni le aw?

= Ni e, LAC leh PLV te hi sawi hran tak tak theih a ni lo va, entirna han sawi ila, LAC chu Health Department-in Sub-Centre……………… PLV chu Health Worker………….

Chuti nit a se, LAC chu khawi khawiah nge din tur ni ta le aw, duhna hmun apiangah din tawp mai chi a ni em?

= LAC hi kan ti mai a,  hei hi NALSA (Legal Aid Clinic) Regulation 2011 anga din a ni a, chumi hnuah Village Legal Care & Support Centre tiin Central lam atangin an rawn tidanglam a, mahse, kan lo hman than tawh LAC tiin sawi chhunzawm ta zel zawk ila, sawi a lo nuam a, mite pawhin an lo hriat tawh dan a ni bawk a.

            LAC hi Central lam chuan khawtinah, tin, Police Station/Outpost zawng zawngah, Jail-ah leh Zirna In (University/College)-ah te din turin min ti a. Amaherawh chu, khawtinah hian kan la din thei chiah lo va, tin, College-ah pawh dilna chu thawn ni tawh mahse, tlemte chauhah kan la nei thei rih a, Jail-ah erawh chuan neih vek a ni tawh thung a. Chu bakah, State leh District authority office-ah hian Front Office tia sawiin din a ni bawk.

Tunah hian engzat chiah nge LAC kan neih tawh le?

= LAC zat – 71 chuang zet chu

Han ngaihthlak atang khan PLV leh LAC chu lak hran tak tak theih a ni lo tihna a ni ta a, thingtlang khaw lam LAC din dawn khan kan lo ngaihtuah chu khawiah nge dina nih ang tih kha a ni.

= Village council te, khawtlang hruaitute`n ruahmanna an lo siam a, tin mimal inah te pawh din a ni tho bawk. A chhan chu, office ang tak taka kalpui tur a ni lo, a chang changing kha LAC –ah khan PLV te an lo thu thin ang a, mipuite pan theihin an lo awm thin dawn tihna a nih mai avangin. LAC –ah an thu kher lo a nih pawhin an remchan dan angin a mamawhtuten an rawn mai thei bawk.

Nichina kan ngaihthlak tak atang khan PLV te hian dan chungchang harsatna lo pawh tihfel pui an nei tawh ni khan ka lo hria a, han sawi mai theih chin a awm em aw?

= Khaw pakhata kan PLV chuan mipuite an pan a, kea kal tha thei lo tan Wheelchair… tui supply an hmuh that loh avangin PHE –ah an kal pui bawk a, chungte chu PLV an nihna angin an lo tanpui a, sawrkar department dangte pawhin lo ngai pawimawhin an dilna an tihhlawhtlin sak a, a ropui kan tihle a. Tin, Social Welfare Department leh PHE Department chungah pawh kan lawm hle a ni.