Story Two

(Thil thleng ngei, amaherawhchu an hming erawh phuahchawp/hming lem hman sak an ni)

L.A. (Pre) Case No. XX/2017

 

Kum 2011 July 15 khan Pi Lalfamkimi chuan Pu Sairengpuia s/o Pu Lalhlimpuia leh a fapa Pu Lalrammawia te LSC No. xxxx/xxxx chu Rs.8,00,000 in a lei a. A man pawh vawikhata pek tlak nghal a ni a. Ngaih tha taka awmin ram an lei pawh chu kut an thlak mai lova. Amaherawhchu, kum 2016 thla tir lam khan an LSC No. xxxx/xxxx lei chu a lem a ni tih an hre chhuak ta si a. Pu Sairengpuia leh Pu Lalrammawia he LSC lei tirtute chu dawr nghalin pawisa inpekkir leh an va ngen a. Vawi tam an indawr hnu pawhin an thu a inhmu fuh thei tlat lova. Pi Lalfamkimi lam hian buaina tipunlun lova inremsiam an duh laiin Pu Sairengpuia te nen an duh dante a inmil lova, remna siam theih a ni lo va. Tichuan, Pi Lalfamkimi te hian Revenue Department lamah LSC No. xxxx/xxxx leh a kaihhnawih lehkha pawimawhte an va dil chhuak a. Chung lehkha pawimawh atanga a lan dan chuan Pu Sairengpuia te LSC neih leh Revenue Deptt. LSC pek chhuah chu a inmil lova. Pu Sairengpuia a hmingpui tho, mahse an pa hming inang lo a lo ni a. Tin, Pu Sairengpuia a te hian kum 2005 khan Pu Lalduhzuala a hnenah he LSC hi  Rs. 1,00,000-in an lo hralh tawh bawk a.

 

Pu Sairengpuia a te hian he LSC hi mi bum nan an hmang thin tih a lang chiang a. Pi Lalfamkimi te chuan hetiang anih takah chuan anmahnia hma la mai lovin Lok Adalat (Mipui Court) chu an pan ta. An LSC leina Rs. 8,00,000 chu hmu kir turin leh pawisa hlutna chhuta a pung nen pe turin dilna an siam ta a.

 

Tichuan, an thute chu lok Adalat-ah ngun taka ngaihtuahin an inkarah inremna siam tumin Conciliators(Remna siamtute) chuan theihtawp an chhuah a. Pi Lalfamkimi te leh Pu Sairengpuia te chuan Lok Adalat-ah an thu chu sawitlangin han inhnial bawrh bawrh chang pawh an nei a. Nimahsela, Conciliators te chuan zaidawh takin an thute ngaithlain inremna an siampui thei ta a.

 

Pu Sairengpuia leh Pu Lalrammawia a te hian midang ram, LSC lem hmangin an hralh a ni tih an pawm a. Pi Lalfamkimi hnenah hian Rs.5,000 an lo pek tawh avangin Rs. 7,95,000 chu thla tin kum thum(3) chhungin Rs. 5,000 aia tlem lovin an rul ang a. An rul zo theilo emaw an rul theilo anih chuan Pu Lalhlimpuia s/o Pu Sairengpuia te chenna in leh hmun Pu Lalhlimpuia hminga LSC awm chu Pi Lalfamkimi hian a nei thei ang tiin inremna chu siam a ni. He an inremna thuthlung hi lungdam takin an pawm tlang a ni.

© Mizoram State Legal Services Authority, 2012

This website belongs to the Mizoram State Legal Services Authority , Government of Mizoram, India. | Template by ICT

Click to start chatting.