SUCCESS STORY
(An hming tak leh veng
hming hi an zahawmna humhim sak
duhna avangin thup sak
an ni)
Pi Kapzuali chuan a harsat manganna
hetiang hian Lok Adalat-ah a rawn thlen.
In leh lo nei in a fate pathum Lalrinthangi,
Lalkapmawii leh Vanlalthara te nen an cheng thin a, Lalrinthangi hian
pasal neiin inhrang ah an cheng tawh a, Lalkapmawii hian fapa pakhat neiin Pi Kapzualite
nen hian an cheng ho a, amah Pi Kapzuali enkawltu ber a ni bawk. Vanlalthara
hian nupui neiin a fate pawh an puitling vek tawh a, a ni hian a nu leh a
laizawnnu Lalromawii te chu a ngaithei lo ta tlat mai a, a nupui thlavang chu a
hau na sawt viau mai a, a mah hringtu a nu ngei pawh chu kut thlak hial te pawh
a hreh ta lo a. Tin, a nupui pawh hian a nu chu biak pawh a be duh lo va,
inchhung mamawh lei ngaite a lo awm chang pawhin lehkha ziakin a lo dah mai zel
a ni. Chubakah a burte a lo chhawp chhuak ringawt zel a, tiang chuan chhungkua
a chengho ni si in inbe mumal lovin hreawm takin an khawsaho thin a ni.A chang
phei chuan Vanlalthara hian buaina siamin zanlaiahte pawh a um chhuak thin a,
khawlaiah te an riak mai thin a ni. Tin naupang ho pawhin hreawm an tiin an zirlai
pawh an zir tha thei thin lo va, chutiang chuan hun rei tak an lo khawsa ho
thin a ni.
A fanu Lalrinthangi pasal chuan a
khawngaih em avangin an inhnuai ruakah chuan awm mai turin a ti a, tichuan Pi Kapzuali
chu a makpa te inhnuaiah chuan a awm ta ringawt mai a ni. An veng Local Council
te pawhin vawi tam tak inremtir tumin an lo buaipui tawh thin a, mahse an
beidawng zel thin si a, Pi Kapzuali hi tar chak tawh lo kum 80 mi lai a ni tawh
a, hetia a makpa te inhnuaia han boral ringawt chu dikin a hre si lo va, ama in
leh lo ngeia luh leh ngei chu a duh si a. Chutiang chuan ama in leh lo ngeia a
awm leh ngei theihna turin a tupa thurawn angin Mizoram State Legal Services
Authority chu a pan a. Office a thawkte chuan a thute an lo ngaihthlak hnuah
Lok Adalat-a tanpuina dil turin lehkha an thehluh tir ta a.
A rawn ngen ang hian Lok Adalat chuan hma a la ta a. Vanlalthara leh Pi Kapzuali te chu a ko ta a, Conciliator fel leh thahnemngai tak takte chuan an thu chu ngun taka lo ngaituahin Vanlalthara hian an chenna in chu lo chei tha in lo extend se la, an chhungkua a nuam tak a an chenho leh theihna tur a lo buatsaih turin an rempui thei ta a, tin, Local Council te pawhin an chhungkaw dinhmun leh inremna chu lo thlithlai reng turin leh inremna thuthlung chu zawm anih leh ni loh an lo enfiah reng dawn bawk a ni.
Vanlalthara hian a thil tih dik loh chu pawmin a chhungkaw enkawl turin a intiam mai bakah a nu hmangaihna hre thar lehin mittui nen hlim takin an haw ta a ni.
