CODE OF CRIMINAL PROCEDURE

 

CODE OF CRIMINAL PROCEDURE,

                                                                                          K.L.Liana, 9-11-2010

                                                                                       Addl Dist & Sessions Judge,                                                                            

          Code of Criminal Procedure, hi a lamtawia Cr.P.C. kan tih thin hi a ni a, a pawimawh em em a ni. Engvangin nge kan Police leh Excise-te hian mi sual, dan bawhchhiate an man ve ringawta engvanga kan Court lama roreltuten jail-a an lo khung ngawt thin? Kan tih chuan he Code, dan hian chutianga tih theihna turin thuneihna a pek avang chauh a ni. Mi jail-a khung tur chuan lalin thuneihna sang tak nei mah sela, Larsap emaw Chief Minister emawte hian thuneihna an nei miah lo thung, a chhan pawh khi dan khian thuneihna a pek ve loh avang a ni, ti ila a dik mai awm e.

 

          Khi danah khian chang 484 lai a awm a, chuvangin kan sawi vek seng dawn lo, a tul leh pawimawh zual nia ka ngaihte tlem tlem sawi mai loh chuan hun leh hmunin a daih lo vang. Heng dan bawhchhia thil sual tite emaw chutianga ti ngei nia an rinhlelhte hi Police-ten chang 41-na angin an man thei a, mahse darkar 24 bak an mi mante an kawl thiang lo, Magistare hnenah an hruai ang a, thil an la zawt duha an la mamawh a nih chuan Magistrate hnenah kawl an dil thei a, Magistrate-in a phal chuan Police Station-ah ni 15 thleng an kawl thei a, a bak chu Magistrate pawhin a kawltir thiang lo. Tin, dan bawhchhiatna a awmin, cognizable leh non-cognisable offence a awm a. Cognisable an tihah chuan Police-ten magistrate atanga phalna la lo leh nei lo pawhin mi an man thei a, non-cognisable an tihah erawh chuan Magistrate phalna la hmasa lo chuan an man thiang lo thung. Heng tualthah, rukruk, mi in rawk, pawngsual leh sualna tam takte hi cognizable offence an tih ang hi a ni. Hetiang ang thil hi miin kan awm laia an lo ti a nih phei chuan mimal kan nihna ang pawhin chang 43 angin tupawhin kan man thei a ni. Mahse thuneitu Police hnenah kan hlan vat tur a ni thung.

 

          Tin, kan hriat atana tha leh tul nia lang pakhat chu dan hian hmeichhiate hi a humhalh a, ni tlak hnu leh a chhuah inkar, zanah reng reng, hmeichhia eng emaw bik teah lo chuan chang 46(4)-na angin Magistrate 1st Class pahlna la hmasa lo chuan man a thiang lo va, a mantu pawh mipa ni loin, hmeichhhe Officer a ni tur a ni.

 

          E khai, sawi tur a tam si, sawi sen a ni si lo. Chang 144-na hi i han sawi teh ang. Hemi ang hian Curfew kan tihte kha puan a ni thin a, Mas dawna halpuah zawrh leh hal an khap te, kawng sira rawra leh thingzai dan an khap te kan hre thin awm e. Hengte pawh hi khimi changin thuneihna a pek avangin Dist Magistrate emaw Sub-Divisional Magistrate emawten an khap thin. Bawrhsap hi Disrict Magistrate chu a ni nghal mai a, Sub-Divisional Magistrate pawh SDO(Sadar) emaw SDO(Civil) emawte hi an ni nghal mai thin. Mizoramah hian kan hmang rim malh malh hle a, khawi emaw laiahte phei chuan ui chhuah khap nante hmangin ui khawlaia an hmuhte pawh an kaphlum a ni lawm ni kha? Mahse hei hi zawng a dik chiah lo deuh. Ui chhuah khapa khawlaia kahhlum nan he chang hian Bawrhsapte thuneihna a pe lo va, mahse tumahin Bawrhsap thupek kha Court-ah a dik lo e, tiin an challenge loh avang chauhin an hmang ta mai thin ni berin a lang.

 

          Tin, he danin thuneihna a pek angin Police emaw Excise emawten mi an man thin a, hetianga mi an mante hi mi sual angin kan ngai fo thin, a dik lo, mi sual leh dan bawhchhiaa an puh an man a ni mai zawk. Puh fuh ngial ngial an ngah a, puh fuh loh lah an tam bawk, mi sual ni loin mi suala puh an man mai chauh a ni, chuvang chuan an mi mante hi “puh” accused tih a ni thin. An mi man khan an puhna angin dan a bawhchhe ngei a ni, tih kha a puha mantu lam khan Court-ah an puhna kha a dikin a tisual ngei a ni, tih kha zaah zain an finfiah a ngai a, chutainga an finfiah theih loh chuan thiamchangin a chhuak tur a ni tlat thung. Mahse thubuai lian lem lo, Magistrate-ten an khawih phak leh khawih theih angah hi chuan, Magistrate-in an puhna kha a dik leh dik loh a zawh a, a dik ngei e, tia a chhan chuan, chu chu plea of guilty an ti a, chumi ang chuan Magistrate khan thiam loh a chantirin a convict nghal thei mai thin. 

 

          Magitrate hi chi thum an awm a, a sang ber chu Chief Judicial Magistrate an ti a, kum 7 thleng a tantir thei a, a chawitir theihah bituk a awm lo. A hnuaiah Magiatate 1st Class leh 2nd Class an awm a, First Class hian kum thum thleng a tantir theiin cheng singkhat thleng a chawitir thei a, 2nd Class hian kum khat a tantir thei a, cheng sangnga thleng a chawi tir thei. Tin, Sessions Court a awm leh a, he Court hian thubuai lian tham Magistrate-te khawi phak loh a khawih thung. He Court-ah hian Judge chi thum an awm a, Sessions Judge a awm a, ani hi a lu ber a ni a, a hnuaiah Addl Sessions Judge leh Asst Sessions Judge an awm. Sessions Judge leh Addl Sesions Judge hi an thuneihna a inang a, mi khaihlum theihna an neiin, dam chhung an tantir thei bawk. Asst Session Judge hian kum sawm thleng a tantir thei. Heng Magitare-te rorela lungawi lo chuan Sessions Court-ah khan an appeal thei a, Sessions Court rorela lungawi loin High Court-ah a appeal thei thung. Tin, Sessions Court-in mi khaihlum tura a tih erawh chuan High Court remtihna  ( confirm ) a ngai thung a ni.

 

          Kan hriat atana tha leh pakhat chu bail chungchang hi a ni a. Hei hi a chunga dan kan tarlan chang 436 leh 437-ah a chuang a. Dan bawhchhiaa an puh an mante hi an puh dan a zirin bail theih chi leh bail theih loh chi a awm a. Chang 436 angin bail theih ang chia mi an man chuan O/C pawhin bail-in a chhuah thei mai a. Chutianga a chhuah lohva Magistrate hnenah an thawn a nih chuan, an mi man khan bail a dil hranpa a ngai lo va, Magistrate khan bail theih a nih thu a lo hrilh ang a, bail-tu tur a hmu thei a ngem, tih a lo zawt tur a ni. Bail-tu tur an awm chuan bail-a chhuah tur a ni a, an awm lo a nih pawhin Magistrate-in a duh phawt chuan Bond-a hming ziaktira intiamtirin a chhuah thei a ni. A awmzia chu bail theih case-ah chuan bail-a chhuah kha an mi man right a ni a, chhuah kha Magistrate-in a ba tihna a ni.

 

          Mahse an puhna kha bail theih loh case a nih chuan bail a dil an mi man khan a ngai thung a, chutianga bail a dil chuan Magistrate-in a ngaihtuah ang a, chhuah tur chi leh chhan tha tawk awma a hriat chuan chhuah chu a thu a ni a, chhuah loh pawh a thu tho a ni. Chumi awmzia chu bail-a chhuah leh chhuah loh chu Magistrate thu liau liau a ni tihna a ni.  Zawhna awm fo thin chu, Magistrate-te hian an khawih phak loh thubuai, tualthah, pawngsual tih angahte bail-in an chhuah fo va, hei hi a dik em ni, tih hi a ni. Chang 437 ang chuan an puhna kha damchhung tan theih emaw khaihlum theih emaw a nih chuan, Magistrate-in bail-a a chhuah ngawt hi a dik chiah lo. A chhuah theihna erawh a awm, chutianga bail-a a chhuah a nih chuan kha an mi man khan khaihlum emaw damchhung emaw tanna tur khawpa thilsual tia a rin loh chuan, tih a ni a. Police-ten an man a, thubuai an chhui lai meka he mi hian khaihlum emaw damchhung tan emaw khawpa hremna tura thil sual a tih ka ring lo, Magistrate-in lo tih ngawt mai chu thil theih loh tluk a niin a lang. Chutiang thubuai lian thama bail an dil chuan Magistrate tana finthlak ber chu a khawih theihtu Session Court-a an dil kha dah mai tur niin a lang. Amaherawhchu an man kha chutianga puh pawh nise, kum 16 hnuai lam emaw, hmeichhia emaw, damlo emaw pianphunga rualban lo emaw a nih erawh chuan Magistrate-in bail-a chhuah mai kha chhan tha tawk awma a hriat chuan a thei thung.

 

          Tunlaia kan hriat lar em em, anticipatorty bail, an tih mai hi kan dan sawi lai chang 438 anga pek leh dil a ni thin. Miin bail theih loh thubuaia man ngei dawn nia a inhriat chuan an man hma hauh khan bail a lo dil lawk thei a, chu chu a ni, anticipatory bail an tihna chhan chu. A pe theitu chu Sessions Court leh High Court a ni. Hetianga miin bail an dil Court-in a lo phalsak ta a nih hian mi tam takte chuan man thiang lo emaw kan ti fo thin. Hei hi a dik lo va, tul leh man ngei ngai an hriat phawt chuan Police-te khan an man thei a, an man tur pawh a ni. Mahse chang 438 anga Court-in bail a lo phalsak tawh a nih chuan Court thu angin an man hnu khan bail-a chhuah leh tur a ni thung zawk. Anticiapatory bail chungchang hi Mizoramah kan tihdan a dik ziktluak lo deuh thin niin a lang. High Court leh Supreme Court rorelna hrang hranga a landan chuan hetianga miin anticipatory bail an dil hian a pawng a puia pek ngawt loh tur niin a lang zawk. A diltu kha miin dawta an puh avanga man tur emaw, a tlanbo dawn lo tih chiang ngei emaw, bail-a lo chhuah pawh nise a thubuai an chhui laia a tibuai dawn lo ngei nia a lan chauha pek zawk tur ni awm tak a ni. Tin, Court-in a lo phal a nih pawhin hunbi a tuk tur niin a lang. Mizoramah chuan hunbi tuk a awm ngai meuh lo va, hei hi a dik chiah lohna chu niin a lang. Khatia Court-in hunbi tuka a phalsak a, a hun a lo ral chuan a thubuai khawih theitu Court-ah bail pangngai a dil leh tur a ni zawk.

 

          Bial chungchangah hian ngaihdan fuh chiah lo kan nei fo thin. Mi bail-a an chhuah hian an thubuai kha fel ta angah kan ngai thin. Hei hi a ni lo, thubuai an ngaihtuah chhung khan jail-a awm loin bail-in a chhuak a, pawn lamah a awm a ni mai zawk. Bail-a kum rei ngial ngial, kum sawm dawn lai thubuai ngaihtuah chhunga lo awm zalen, a tawpa Court-in thiam loh a chantir, kum sawm emaw kum sarih emaw damchhung emaw tang tura jail-a dah leh an tam khawp mai. Chumi awmzia chu bail-a mi an chhuah hian an thubuai a fel mai lo, tih a chiang a, mahse thiam a chan erawh chuan a tawpa jail-a luh leh ngai tawh lohin a zalen hlen ta thung a ni.

 

          He dan chang 167-na hi a pawimawh em em mai bawk a. Mi an mante reng reng hi an puhna kha kum sawm hnuai lam a hrem theihna ni ta se, kha thubuai kha thla hnih chhungin chhui zo hman loin charge sheet Court-ah a mantu lamin thehlut hman ta lo sela, bail theih loh thubuai kha bail theih thubuai a lo ni ta a, an mi man khan bail a dil phawt chuan hnar a thiang lo va, bail-a chhuah a right a ni ta thung a nih chu. Tin, a hrem theihna kha damchhung tan theih emaw khaihlum theih emaw  kum sawm thleng tan theih emaw a nih erawh chuan a dang thung a. Thla thum chhunga a thubuai kha  an chhui zawh hman loha charge sheet an thehluh hman loh chuan a chunga kan sawi ang bawk khian bail-a chhuah kha a right a nih chu. Kan Police leh Excise te an buai a, Police phei chuan thubuai chi hrang hrang chhui tur an ngah em em a, eng emaw harsatna avanga thla hnih emaw thla thum emaw chhunga an chhui zawh hman tak loh a awm thei fo va. Chutiang a lo nih chuan an mi man kha bail-a chhuah a lo ngai ta a, chhuah an ni fo thin bawk. Mipuiten kan hrethiam lo fo va, bail-in an chhuah leh mai thin, tiin Court lam kan dem lek lek thin a nih hi. Hei hi chu kan hriatthiam loh avang a niin a lang. Court chuan dan angin ro a rel tur a ni dawn lawm ni? A ni e, dan angin a rel tur a ni.

 

          E khai, a pawimawh bera pawh ka hrethiam lo,  sawi tur a tam, sawi sen vek a ni si lo. Thil pakhat chauh ka han sawi leh hram ang e. Chang 320-na angin thubuaiah hian inrem theih chi a awm a, inrem theih loh chi a awm bawk. Entir nan, pawn lama thil ru, an thil ruk kha cheng zathum man hu ang pawh ni lo ta se, inrem theih a ni a, chutianga an inrem chuan rukruk thubuai neia kha thiamchanga chhuah tur a ni. Mahse mi in chhunga thil ruk erawh chu cheng nga man pawh nise, a rutu leh a ruksaktu kha lo inrem pawh nise, Court tan pawm a thiang lo thung.

 

          Mizote hi tlawmngai thei tak kan ni a, miin kan in chhung khur ngeia lo kala ngaihdam min rawn dil hi chuan, eng thubuai pawh nise, tualthah thlengin ngaihdam theih loh hi kan nei lo ni berin a lang. Pathian hminga miin ngaihdam an dil mawlh mawlh pawha ngaidam thei thlawt lotu chu mi sualah hian kan ngai letling zawk fo thin a nih hi. Mahse dan lamah chuan a ni miah lo mai. Tualthat ngei ngeite pawh hi a thattu chu jail-ah tang mah se, an nu leh pa emaw, an chhungten emaw a thata chhungte hnenah inngaitlawm leh thuhnuairawl taka kalin Pathian hminga ngaihdam an dil, Pathian hminga an lo ngaihdam tak mai hi a tam khawp mai. Ziak meuhin an inngaidamin an inngaihdamna pawh Court lama pek a tam thin. Mahse Court chu dan ang taka rorel mai tur a nih avangin mi chutiang takin lo inngaidam pawh nise, an inngaihdamna chu a pawm thei lo va, kan inngaidam daih tawh si a, thubuai lah chu a tawp mai loin a la kal zel a, te hi kan ti thin fo mai.

          Court chuan an inngaihdamna chu pawm lo mah sela, Mizopa rilru ni fo chu, Pathian hmingha a ngaihdam tawh Court-a hrem a nih theihna tura evidence pek leh hi kan duh tawh thin lo niin a lang. Court-in thuhretu an nih anga vawi tam tak a koh, kohna pawh hmu ngei, mahse Pathian hminga an lo ngaihdam tawh, Court-a kal duh ta lo hi an tam khawp mai. Pathian hming hi a ni lo zawngin kan hmang tangkai a nih ber hi, tihfiamthu a awl thin. Chutianga Court-a evidence an pek duh miau si loh chuan, a puhtu tan pawh Court-ah a that ngei a ni, a pawngsual ngei a ni, a ru ngei a ni, tih kha finfiah ngaihna a awm thei tawh lo va, that reng kha Court tan lah thiam chantir ngawt theih ni tawh bawk si lo, chutiang avanga that ngeitu pawh thiamchanga zalen ta hi mi tam tak an awm thin. Court emaw a mantu lam emaw kha va dem ngawt chi pawh a ni lo, Pathian hming an lo hmang tangkai a ni anga ngaihpui ve mai chi ni awm tak a ni.

 

          Kan sawi lai dan hi a pawimawh a,  he danin thuneihna a pekavang hian MLTP bawwhchhia zu zuar te, Drugs zuar te, pawngsual te, tualthat te, rukru te, pawisa lem hrerenga hmangte pawh hrem leh jail-a khung an ni thin a lo ni e. Danin thuneihna a pek ve ni lem lo, lo phur ve em em hi Mizote zingah kan awm fo thin, hei hi chu a dik chiah lo deuhin a lang. A ti theitu, danin thuneihna a pekte pun mai hi a tha ber a, Court  rotreltu pawh ni ve uk lo, ni emaw inti ang ziazanga tute emaw pawisa lo chawitir a, lo ngaidam ve ta mai mai tawk pawh kan awm fo thin, hei hi chu a zahthlak lam deuhin a lang.

 

          Dan a lalna apiangah zalenna a awm thin, tih a ni a, kan ramah hian dan hi lo lal ber fo sela, haw-haw leh khuangpui nena vau zam tum ang ziazanga Court tualzawla inpun khawm tuau tuaute pawh hi lo bo tawh sela, dan hmaah chuan rethei leh hausa, mi lian leh mi te, mi tupawh hi kan intluk tlang vek a ni, tih hi i hre nawn fo ang u. Sawi tur tam hle mah se, kan sawi seng dawn lo ve, i duhtawk mai ang.

© Mizoram State Legal Services Authority, 2012

This website belongs to the Mizoram State Legal Services Authority , Government of Mizoram, India. | Template by ICT

Click to start chatting.